इटहरी चोकमा घरधनीको अवरोधले रोकियो ६ लेन सडकको कालोपत्रे

इटहरी : इटहरीको मुख्य चोक (विराटनगर लाइन) मा सडक कालोपत्रे गर्ने काम अलपत्र परेको छ । माघ महिनामै सम्पन्ने गर्ने तयारी गरेको निर्माण कम्पनीलाई दुई घर धनीले अवरोध गरेपछि काम रोकिएको हो ।

इटहरी-६ का मेघराज पराजुली र युनिस सुवेदीले काम गर्न नदिएपछि थप काम हुन नसकेको निर्माण कम्पनीले गुनासो गरेको छ । गत असोज १२ गते निर्माण कम्पनी शुभकामना-बोहरा-युनिक जेभीले सडक आयोजनालाई अवरोध खुलाइदिन भन्दै निवेदन दिएको थियो ।

रानी विराटनगर इटहरी धरान सडक आयोजनाका प्रोजेक्ट म्यानेजरलाई निवेदन दिएको ५ महिना बितिसकेको छ । इटहरीको मुख्य चोकको दुई सय मिटर क्षेत्रमा सडक कालोपत्रे हुन सकेको छैन ।

निर्माण कम्पनीका इन्जिनियर राजेश बोहराका अनुसार एकै पटक सम्पूर्ण कालोपत्रे गर्ने तयारी भए पनि घर धनीले अवरोध गरेको कारण समस्या भइरहेको छ । उनका अनुसार कल्भर्ट समेत निर्माण भइसकेको अवस्थामा अवरोध भएको हो ।

इटहरी उपमहानगरपालिकाको समन्वयमा सडकको क्षेत्राधिकार भित्र पर्ने घर भत्काउने सहमति भए पनि पछिल्लो समय पुन: पराजुली र सुवेदीले नयाँ प्रस्ताव ल्याएपछि निर्माण कार्य रोकिएको बताइएको छ ।

उता पराजुलीले भने सडकको पूर्वतर्फ एउटा र पश्चिम तर्फ अर्को मापदण्ड भएपछि समस्या भएको बताए । आफूहरूले दुई मिटरको पेटी बनाएर ब्लक ओछ्याउन आग्रह गरेको बताउँदै उनले एक मिटरको मात्र पेटी बनाएर पुनः दुख पाउन नचाहेको उनले खुलाए । सडक बनाउन नदिने नियत नभएको प्रष्टपार्दै पराजुलीले समान मापदण्ड पालन गर्न आग्रह गरेका छन् ।

सडक आयोजनाले इटहरी उपमहानगरपालिकाका मेयर र सम्बन्धित वडाका वडा अध्यक्ष सहित छलफल गरेर काम अगाडि बढाउने तयारी गरेको छ । निर्माण कम्पनीले पनि समन्वयको लागि आयोजना कार्यालयलाई ताकेता गरिरहेको छ ।