_1735354691.gif)
धरान : भविष्यको लक्ष्य निश्चित गर्न नसके व्यक्ति, देश, समाज अघि नबढ्ने र कुनै ठाउँको भविष्यको योजना नभए इतिहासमा विलीन हुने धनकुटा मुलघाट स्थित विश्रान्ति आश्रमका धार्मिक गुरु विजयानन्द सरस्वतीले बताएका छन् ।
उनले मुलघाट र विश्रान्ति आश्रमलाई भविष्यमा पूर्वकै धार्मिक पर्यटनको गन्तव्य बन्ने सम्भावना रहेको पूण्यस्थल भएकोले भौतिक र सेवा सुविधाको विस्तारका लागि आर्थिक श्रोत जुटाउन पहिलो पटक १५ दिने शिव महापुराण आयोजना गर्ने तयारी गरिएको बताए ।
_1743784132.gif)
महापुराण आयोजक समितिका संरक्षक जिया नन्द सरस्वतीले यसबाट ऐतिहासीकस्थल मुलघाट र आश्रमको महत्वको बारेमा प्रचार प्रसार भई धार्मिक पर्यटनको प्रवर्द्धन पनि हुने विश्वास व्यक्त गरे ।
धनकुटा धरान एकता समाजद्वारा आज शनिवार आयोजित विश्रान्ति आश्रमको विकासका बारेमा अन्तर क्रियामा सहभागीहरूले आश्रमको विकासका लागि आयोजना हुने शिव महापुराणमा धरानबाट सहयोग हुने प्रतिबद्धता जनाए ।
आश्रमका महासचिव जनार्दन घिमिरेले आश्रम स्थापना भएको ४० वर्ष पछि पहिलो पटक धार्मिक अनुष्ठानको आयोजना गरिएकाले यो अवसर ऐतिहासिक महत्वको हुने बताए । उनले भने ‘आश्रमलाई अहिलेको अवस्था सम्म ल्याउनमा धरानको ठुलो योगदान रहँदै आएको छ ।’
२०४० सालमा स्थापना भएको आश्रमको भौतिक र व्यवस्थापन विकाशलाई सरकारबाट समेत उत्कृष्ट मानिएको छ । आश्रममा हाल ५० जना वृद्ध/वृद्धाहरू आश्रित छन् । गौशाला, पाकशाला, वेद विद्यालय, यज्ञ शाला र धर्मशाला सञ्चालनमा छन् ।
धार्मिक अनुष्ठान, विवाह, व्रतबन्ध गर्न गराउन सबै सुविधा उपलब्ध छ । आश्रम परिसरमा शिव पाञ्चायन मन्दिर स्थापित छ । तमोर किनारमा दाहसंस्कार गर्न आउनेहरूका लागि मलामी घर, काजक्रिया गृहको सुविधा समेत आश्रममा उपलब्ध छ ।
महासचिव घिमिरेका अनुसार आश्रमले यसअघि भौतिक निर्माण एवं व्यवस्थापन निम्ति कसैलाई ठुला आर्थिक भार नहुने १ रुपैयाँबाट १ करोडको कोष वृद्धि योजना अघि बढाएकोमा सफल भएको उल्लेख गर्दै भने ‘१/१ रुपयाबाट ५ वर्षमा १ करोड सङ्कलन गर्ने कार्यक्रममा ४ वर्षमै १ करोड भन्दा बढी रकम सङ्कलन भयो ।’
शिव महापुराण आयोजक समितिका सह कोषाध्यक्ष रेडियो नेपाल धनकुटाका प्रमुख तिलविक्रम चेम्जोङले विश्रमन्ती आश्रम पर्यटनको दृष्टिले महत्पूर्ण गन्तव्य भए पनि पनि प्रचार प्रसारको कमीले ओझेलमा परेको बताए ।
उनले भने ‘भेडेटार सम्म आउने पर्यटक पछिल्लो समय नमस्ते झरना सम्म आइपुग्न थालेका छन् ।’ तर तमोर नदीबाट सप्तकोसी सम्म साहसिक खेल ¥याफटिङ,जलयात्राको महत्त्वपूर्ण विन्दुको रूपमा रहेको मुलघाट सम्म पर्यटक ल्याउने धार्मिक र पर्यटकीय केन्द्रको रूपमा विश्रान्ति आश्रमको विकास प्रचार प्रसार गर्न आवश्यक भएकोमा उनले जोड दिए ।
चौबीसे समाजका अध्यक्ष गणेश देवानले धनकुटाको तमोर र आश्रम आसपासको क्षेत्र ऐतिहासिक स्थलहरू भएको ठाउँ भएको स्मरण गराउँदै अहिले पनि तमोरका किनारमा डुबेका भग्नावशेष मन्दिर देख्न सकिने बताए ।
विश्व हिन्दु महासङ्घका सुनसरी अध्यक्ष आनन्द आचार्यले विश्रान्ति आश्रमको स्थापना र विकास धनकुटा र धरानका नेवार समुदायबाट भएको उल्लेख गरे । पछिल्लो समय आश्रमको विकासमा लागेका पिठाधिश विजयानन्द सरस्वतीको प्रयास स्तुत्य भएको बताउँदै महासङ्घले शिव पुराणमा अधिकतम सहयोग पु¥याउने प्रतिबद्धता जनाए ।
समाजका अध्यक्ष गङ्गाप्रसाद रेग्मीको सभापतित्वमा भएको अन्तर क्रियामा धरान–११ का वडाध्यक्ष लोकेन्द्र फागो, विष्णु पादुका मन्दिर अध्यक्ष राजकुमार निरौला लगायत सहभागीहरूले महापुराणमा धरानबाट सक्रिय सहभागिता जनाउने प्रतिबद्धता जनाए ।
समाजका उपाध्यक्ष जयप्रसाद निरौलाले सञ्चालन गरेको अन्तर क्रियामा भजन समूहबाट भजन प्रस्तुति पनि भएको थियो । व्यवस्थापनमा समाजका सचिव राजकुमार थापाले सहजीकरण गरेका थिए ।
_1664681437.jpg)
