धरान : नेकपा माओवादी केन्द्र निकट प्रेस सेन्टर नेपालका केन्द्रीय सदस्य भरतराज शर्मा (गोपाल) ले साधारण सदस्य समेत नरहने गरी राजीनामा दिएका छन् ।

गएको माघ २६ गतेको मितिमा केन्द्रीय समितिलाई राजीनामा पत्र प्रेषित गरेको उनले बताएका छन् । सेन्टरको प्रदेश, जिल्ला समितिलाई बोधार्थ दिएको राजीनामा बारे कतिबाट कुनै प्रतिक्रिया नआएको उनले बताए ।

सुनसरीमा क्रान्तिकारी पत्रका सङ्घ गठन भएयता १७ वर्ष देखी सङ्गठन विस्तारमा इमानदारता पूर्वक क्रियाशील रहँदै सेन्टरको जिल्ला प्रदेश हुँदै केन्द्रीय सदस्य भएको उल्लेख गर्दै राजीनामा पत्रमा उनले सङ्गठनको काम गराई प्रति लामो असन्तुष्टि पोखेका छन् । आफूसँग भेदभाव गरिएको उल्लेख गर्दै पत्रमा ‘मलाई व्यक्तिगत रूपमा सङ्गठन भित्र र बाहिरबाट लाञ्छना लगाउने, समान व्यवहारको ठाउँमा तल गिराउने र तल देखाउने जस्ता काम सङ्गठनका जिम्मेवार कामरेडहरुबाट पटक पटक गरिएको छ ।’

राजीनामा पत्रमा उनले आफू सरकारी जागिरे भएकाले राजीनामा दिनुपरेको पनि उल्लेख गरेका छन् । भनेका छन् ‘म जिल्ला हुलका कार्यालय धरानमा समेत सरकारी जागिरे भएकोले पनि सङ्गठनको काम कारबाहीलाई अगाडि बढाउन सहयोग गर्न नसक्ने भएकोले पनि राजीनामा आएको हो ।’