_1749430366.gif)
धरान : धरान उपमहानगरपालिकाको आज शुक्रवार बसेको कार्यपालिका बैठकमा अल्पमतबाट आर्थिक वर्ष २०८२/०८३ को बजेट पारित गरिएको छ ।
बैठकमा बजेट टेबल हुनअघि एमालेका प्रमुख सचेतक अनुप देवान र धरान १० का वडाध्यक्ष विवेक राईले बजेट पुनर्लेखन गरेर पेस गर्नुपर्ने माग सहित ५ बुँदे जानकारी पत्र दिँदै बैठकमा उपस्थित १५ जना कार्यपालिका सदस्यहरू बैठक बहिस्कार गरी बाहिरिएका थिए ।
एमालेका उपस्थित सदस्यहरू बाहिरिएपछि बैठकमा नगर प्रमुख हर्क साम्पाङ, उपप्रमुख अईन्द्र विक्रम बेघा र वडाध्यक्षहरू सहित ११ को उपस्थितिमा अघि बढाइएको बैठकले बजेट पारित गरेको हो ।
बैठक सञ्चालन गर्दै नगरप्रमुख साम्पाङले १३ वटा वडाले बजेट ब्रेक डाउन गरी बजेट पठाएको जानकारी दिए । उनले बजेट ब्रेकडाउन गरेर पठाउने यहाँ बाहिरिने दोहोरो भूमिका कुनैपनि वडा अध्यक्ष गर्नु नहुने बताए । साम्पाङले भने ‘लहड र भावनामा बगेको आधारमा निर्णय गरेर बजेट ल्याएको होइन ।’
बैठकबाट बाहिरिएकाहरू मध्येकै प्रतिनिधीहरुले १७ औँ पटक बैठक बस्दा समेत सहमति दिएको बताउँदै प्रमुख साम्पाङले १८औ पटकमा पार्टीको निर्देशन भन्दै असहमति जनाएको बुझिएकाले कसैको चित्त बुझ्यो, कसैको बुझेन भन्दैमा बैठक स्थगित नहुने बताए ।
बैठक सुचारु गर्दै नगरप्रमुखले बजेट ब्रेकडाउन गरेर पठाउने वडाहरू १, ३, ४, ५, ६, ९, ११, १४, १५, १६, १७, १८,२० भएको बताए । प्रमुख साम्पाङले एजेण्डा प्रस्तुत गर्दै नीति कार्यक्रम समेत पास गर्न प्रस्ताव गर्दै भने ‘कहिले हुने भन्ने कहिले नहुने भन्दै बजेटलाई डेडलक राखेर हुँदैन जे जति छौ त्यतिबाट बजेट सिलिङ पास गर्न अनुरोध गर्दछु ।’
एजेण्डा नम्बर ७ मा बाढीका कारण खोला च्यानलिङ गर्ने र ढुवानी भाडा भुक्तानी गर्नेमा छलफल समेत गराए । छलफलमा वडा १६ का अध्यक्ष मुरारी भट्टराई, वडा १४ का अध्यक्ष कृष्ण भट्टराई र वडा १७ वडा अध्यक्ष मनोज भट्टराईले खोला च्यानलिङ गर्दै खोला नियन्त्रण गर्नु पर्ने धारण राखे ।
छलफल पछि प्रमुख साम्पाङले स्थानीय तहमा प्रतिपक्ष र सत्ता पक्ष नहुने बताउँदै बैठक स्थगित गरी परामर्श समितिलाई आफ्नो कार्यकक्षमा छलफलका लागि आव्हान गरे ।
यसअघि बैठकको प्रारम्भमा वडा १० का वडाध्यक्ष विवेक राईले विषयगत समिति, सीमा निर्धारण समिति र उपप्रमुखको संयोजकत्वमा बस्ने बजेट तर्जुमा समितिको पुन बैठक बसेर पुन बजेट अवलोकन गर्नुपर्ने माग राखे ।
एमालेका प्रमुख सचेतक अनुप देवानले बुझाएको जानकारी पत्रमा १० जना वडाध्यक्ष, ८ जना कार्यपालिका सदस्य, १ जना कावा अध्यक्ष सहित १९ जनाको नामावली भए पनि संसदीय दलका नेता वडा १५ का अध्यक्ष नरेश कुमार ईवराम, धरान-४ का वडाध्यक्ष धन बहादुर राई, कार्यपालिका सदस्य देवीका विश्वकर्माले हस्ताक्षर गरेका छैनन् ।
बैठकमा संसदीय दलका नेता इवारम, वडा ४ का अध्यक्ष राई, कार्यपालिका सदस्य दिनेश गजमेर र कार्यपालिका सदस्य विश्वकर्मा उपस्थित थिएनन् । कार्यपालिका सदस्य देवीका विश्वकर्मा जेठ २ गते देखि वैदेशिक रोजगारीको सिलसिलामा दुबईमा छन् ।
प्रमुख सचेतक देवानले जानकारी पत्रमा यस बजेटको कुनैपनि शीर्षकमा कर वृद्धि गर्न नहुने र घाटा बजेटलाई पुरा गर्ने नाममा नगरवासीलाई करको भार थप्ने गरी ल्याएको प्रस्ताव अस्वीकार रहेको बताए ।
पत्रमा मेयर, उपमेयर कोष र भिजन, कार्यपालिका सदस्यको कोष जस्ता अवण्डा कोषहरू खारेज गरिनु पर्ने, नगरको यथार्थ आम्दानीलाई आधार मानी सोही अनुसार बजेट सीमा निर्धारण गर्नुपर्ने माग गरिएको छ । नगरसभाबाट पारित भई रातो किताबमा प्रकाशित योजनाहरू नगर प्रमुखले तोक विना कार्यान्वयन गर्न नपाउने सामन्ती व्यवहार देखाएको प्रति आपत्ति जनाइएको छ ।
नगर सभाबाट पारित योजनाहरू आईन्दा हस्तक्षेप नगरी कार्यान्वयनमा लैजाने लिखित प्रतिबद्धता नगर प्रमुखले कार्यपालिकामा गर्नुपर्ने र घाटा बजेट पुरा गर्ने नाममा उठ्नै नसक्ने राजश्वको प्रक्षेपण गरेर जनप्रतिनिधि र जनतालाई भ्रमित पार्नु नहुने माग पनि गरिएको छ ।
बैठकबाट बाहिरिएका कार्यपालिका सदस्यहरूले नगरपालिका अगाडि पत्रकार सम्मेलन गर्दै मेयर, उपमेयर भिजन र कोष हटाउँदै घाटा बजेट ल्याउन नहुने बताए । करको दर घटेमा मान्य हुने धारण व्यक्त गरे ।
उनीहरूले मेयर उपमेयर कोष र भिजन अघिल्लो कार्यकालमा भयो भन्दैमा सधैँ बाउ बाजेले दौरा सुरुवाल लगाएको भन्दै छोराले पनि दौरा सुरुवालनै लगाउनु पर्छ भन्न नहुने धारणा राखेका थिए ।
