_1735354691.gif)
धरान : धरानमा सहकारीहरूमा अपचलन बढ्नु, बचतकर्ताको रकम डुब्नुमा धरान उपमहानगरपालिको अनुत्तरदायी भूमिका पनि एउटा कारण भएको धरान-१५ का वडाध्यक्ष नरेश ईवरामले बताएका छन् ।
उपमहानगरपालिकाले बनाउनु पर्ने स्थानीय सहकारी सञ्चालन ऐन, नीति नियमावली नभएकाले धरानका सहकारी सञ्चालक भाग्ने, जेल जाने क्रम जारी रहेको बताउँदै उनले भने ‘बचतकर्ताको पैसा डुबिरहेको रहेको छ ।’
धरानमा ४ वटा नगर प्रमुख फेरिए पनि स्थानीय सरकारको सहकारीप्रति स्पष्ट नीति नबनेको उनको भनाई छ । आज बुधवार ६८ औँ राष्ट्रिय सहकारी दिवसको कार्यक्रममा उनले उक्त कुरा बताएका हुन ।
हालका नगर प्रमुख हर्क साम्पाङलाई सहकारी नीति बनाउन माग गर्दा फेसबुकमा भाइरल हुने कुरा मात्र गर्ने, लडाउने जुधाउने काम मात्र गरेको उनले आरोप लगाए । वडाध्यक्ष इङवारमले भने ‘मेयरबाटै बचतकर्ताको पैसा सुरक्षित गर्ने नीति बनाउन बेवास्ता भयो ।’
धरानका २० वटै वडा वित्तीय कारोबार सहितको वडा कार्यालय सञ्चालनमा रहे पनि उपमहानगरपालिकाले सहकारी ऐन कार्यविधि नबनाउँदा निगरानी गर्ने काम सम्म नभएको उनको भनाइ छ । भने ‘सहकारी निगरानी गर्न स्थानीय सरकारले नीति बनाएर वडालाई जिम्मा दिए कोही व्यक्ति उम्कन पाउँदैन ।’
उनले सहकारीलाई सिध्याउन बैङ्कहरू लागेको आरोप पनि लगाए । बैङकहरुले सहकारी सक्यो ध्वस्त भयो भन्दै हौवा मच्चाएको उनले बताए । धरानको २/४ वटा सहकारी डूबेपनि सबै त्यस्तो नभएको दाबी गर्दै भने ‘धरानमा ८७ वटा सहकारी छन्, बचेका ८३ वटा सहकारीले सफल छन् ।’
६८ औँ राष्ट्रिय सहकारी दिवस मनाउन नगर सहकारी समन्वय समितिको आयोजनामा कार्यक्रम भएको हो । दिवसको अवसरमा सहकारी संस्थाहरूको र्यालीले भानुचोक, छाताचोक सिंहदेवी चोक पुरानो बजार हुँदै भानुचोक सम्म परिक्रमा गरेको थियो ।
सहकारी दिवसमा धरान सहकारी समन्वय समितिले दिव्य ज्योति सहकारी संस्था उत्कृष्ट सहकारी घोषित गरेको छ । सोही अवसरमा भएको रक्तदानमा कुल ३८ प्रिन्ट रगत सङ्कलन भएको छ । कार्यक्रम समन्वय समिति नगर अध्यक्ष मिसन लामाको सभापतित्वमा भएको थियो ।
_1664681437.jpg)
