इटहरी : नेकपा एमालेका महासचिव शङ्कर पोखरेलले इटहरीमा आयोजित जनजागरण सभालाई सम्बोधन गर्न माइक समाए ।

आफ्ना नेताहरूलाई सम्बोधन गरिसक्न नपाउँदै पूर्वराजा ज्ञानेन्द्र साहप्रति आगो ओकल्न थाले । गणतन्त्र पक्षधर एक हुनुपर्ने भनाई राख्दै पूर्वराजा प्रति आक्रोशित बने पोखरेल ।

कार्यक्रमको सुरुवात देखि अन्त्य सम्म नै साहलाई लक्षित गर्दै गाली गरे । चैत १५ गते राजसंस्था पुनर्स्थापनाको लागि भएको आन्दोलनको योजनाकार उनै साह भएको पोखरेलको आरोप छ । आन्दोलनको क्रममा एक पत्रकार सहित दुई जनाको निधन भएको र त्यसको योजनाकार साह भएको उनको भनाइ छ ।

नेकपा एमाले सुनसरी जिल्ला कमिटीले आयोजना गरेको कार्यक्रममा उनले पूर्वराजाले उद्दण्डता, अराजकता र हिंसा मच्चाएको बताए । अराजकताको सम्पूर्ण जिम्मेवारी पूर्वराजाले लिनुपर्ने बताउँदै उनले फाल्गुन ७ गते नै संविधानको खिलाफमा आव्हान गरेर चैत्र १५ गते विध्वंस मच्चाएको उल्लेख गरे ।

सो घटनाको विषयमा पूर्वराजाको धारणा अहिलेसम्म नआएको र आफ्नै परिवारको निम्ति मात्र नभएर सबै नेपालीका लागि बैगुनी मान्छे रहेको पोखरेलले टिप्पणी गरे ।