_1735354691.gif)
धरान : बुढासुब्बा गोल्डकपको २५औँ संस्करणका लागि आर्थिक सहयोगको वचन पाएको रकम उठेमा कुल २१ लाख ५९ हजार ५० रुपैयाँ बचत हुने देखिएको छ ।
आयोजक धरान फुटबल क्लबले आज आइतबार प्रतियोगिताको आय व्यय सार्वजनिक गर्दै उठ्नु पर्ने १५ लाख रुपैयाँ थाती राख्दा कुल ६ लाख ५९ हजार ५० रुपैयाँ बचत रहेको हिसाब सार्वजनिक गरेको छ ।
गोल्डकपका लागि अखिल नेपाल फुटबल सङ्घ एन्फाबाट ५ लाख, राष्ट्रिय खेलकुद परिषदबाट ५ लाख र धरान उपमहानगरपालिकाका वडाहरूले सहयोग गर्ने भनी वचन दिएको ७ लाख रुपैयाँ उठ्न बाँकी रहेको हिसाबमा देखाइएको छ ।
अध्यक्ष प्रताप तामाङले भने ‘उद्घाटन समारोहमा मुख्यमन्त्री, खेलकुद विकास बोर्डका सदस्य सचिव ज्युले १५ लाख रुपैयाँ सहयोग गर्ने बचन दिनु भएपनि ५ लाख रुपैयाँ मात्र प्राप्त भयो ।’
अघिल्लो गोल्डकपको तुलनामा यसपालि केही न्यून रहेपनि प्रतियोगिता विदेशका शुभेच्छुकहरूको सहयोगमा निर्भर रहेको उनले बताए ।
विदेशबाट यसपालि सबै भन्दा बढी अरुण राई पोचुर्गलबाट ५ लाख, धरान युके हेल्पिङ हेण्डस् ४ लाख ५० हजार, धरान हङकङ मञ्चको संयोजनमा कुल ३ लाख ३७ हजार ८ सय, धरान युके समाजबाट १ लाख ७९ हजार प्राप्त भएको छ ।
२५औँ गोल्डकप गत माघ २६ गते सम्पन्न भएको थियो । क्लबले हिसाब पारदर्शी बनाउने प्रतिबद्धता अनुसार एक महिना पनि नबिताई हिसाब सार्वजनिक गरेको हो ।
क्लबका कोषाध्यक्ष धनबहादुर राईद्वारा प्रस्तुत आयव्यय अनुसार २५औँ संस्करणमा उठ्न बाँकी रकम बाहेक कुल आय ६६ लाख ९९ हजार १५० रुपैयाँ छ । कुल व्यय ६० लाख ४० हजार १०० रुपया भएको छ ।
आय मध्ये गोल्डकपको संयोजक धरान उपमहानगरपालिकाले ९ लाख रुपैयाँ भुक्तान गरेको छ । गोर्खा ब्रुअरी प्रालिबाट ४ लाख २५ हजार, रेडबुलबाट १ लाख १० हजार प्राप्त भएको छ ।
गेट टिकट दर्शकहरूबाट ११ लाख ६५ हजार रुपैयाँ सङ्कलन भएको छ । उक्त रकम रङ्गशालाको दैनिक गेट टिकटबाट ९ लाख ६५ हजार र सिजनल टिकट बिक्रीबाट २ लाख रुपैयाँ प्राप्त भएको हो ।
अध्यक्ष प्रताप तामाङका अनुसार विभिन्न मुलुकमा रहेका बुढासुब्बा गोल्डकपका सहयोगीहरूबाट यस वर्ष २१ लाख ३२ हजार १ सय ५० मात्र प्राप्त भयो । उनले भने ‘विदेशबाट आउने सहयोगमा यसपालि कमी भएपनि अर्को वर्ष बढाउने जमर्को गर्नेछौँ ।’
क्लबका महासचिव नवीन राईले सञ्चालन गरेको पत्रकार सम्मेलनमा वरिष्ठ पत्रकार हर्ष सुब्बाले गोल्डकपको २५ औँ संस्करण सफल आयोजना गरेकोमा अध्यक्ष प्रताप तामाङ सहितको टिमलाई बधाई दिए ।
उनले क्लबको मितव्ययीताले गोलडकप सफल भएको भन्दै गोलडकप आयोजनामा विदेशबाट आउने सहयोग बढाउन जोड दिन आग्रह गरे ।
बुढासुब्बा गोल्डकपको २५औँ संस्करण माघ १९ देखी २६ गते सम्म धरान रङ्गशालामा सञ्चालन भएको थियो । २५औ अन्तर्राष्ट्रिय बुढासुब्बा गोल्डकपको उपाधि न्युरोड टिम एनआरटीले हात पारेको थियो ।
आयव्ययको विवरण निम्नानुसार छ :
_1664681437.jpg)
