धरान : घरेलु तथा साना उद्योग कार्यालयले महिलाहरूलाई स्वरोजगार बनाउन धरानमा निःशुल्क १ महिने एडभान्स ब्युटी पार्लर तालिम दिएको छ ।
पछिल्लो समय वैदेशिक रोजगारीमा महिलाहरू पनि बढी मात्रामा जाने गरेकोले उनीहरूले लिएको सिपमूलक स्वदेशमा पनि रोजगारी सिर्जना गर्न सकिने विदेश जाँदा पनि दक्ष कामदारको रूपमा अवसर पाउने उद्देश्यले तालिम दिइएको कार्यालय प्रमुख राजन पाण्डेले बताए ।
तालिम गत माघ १३ गते सुरु भई फागुन १६ गत सम्म सञ्चालन भएको हो । तालिममा धरान लगायत सुनसरीका २० जना महिला सहभागी थिए ।
समापनको अवसरमा प्रमुख अतिथि कोशी प्रदेश सभा सदस्य यशोदा कायस्थले ब्युटी पार्लर सम्बन्धी तालिमले महिलाहरूको आन्तरिक क्षमता वृद्धि गर्दै स्वरोजगारी सिर्जना गर्ने बताइन् । यसबाट उनीहरूको आर्थिक रूपमा समेत टेवा पुग्ने भएकोले तालिम उपयोगी रहेको उनको भनाई थियो ।
उद्योग वाणिज्य सङ्घका अध्यक्ष विजय श्रेष्ठले ब्युटी पार्लरको माग बजारमा बढेकोले तालिमबाट महिलाहरूलाई स्वरोजगार बन्न अवसर सहज रूपमा प्राप्त हुने बताए ।
प्रशिक्षक सुशीला श्रेष्ठले तालिमबाट महिलाहरूलाई आत्मनिर्भर बनाउने उद्देश्यले सञ्चालन गरिएकोले सीप सिकेर व्यवहारमा जीविकोपार्जनको लागि लागु गर्न आग्रह गरिन् ।
तालिमका सहभागी मनिका श्रेष्ठले तालिम पाएपछि निकै खुसी लागेको र तालीमबाट सीकेको कुरालाई व्यवहारमा लागु गर्ने बताइन् ।
कार्यक्रममा घरेलु तथा साना उद्योग कार्यालयको अधिकृत यस कुमार थापा, कर्मचारी सरिता उराव, धरान १ को वडाध्यक्ष यक्षमणी आचार्य लगायतको उपस्थिति थियो ।