_1735354691.gif)
धरान : पूर्व प्रधानमन्त्री माओवादी केन्द्रका अध्यक्ष पुष्पकमल दाहाल प्रचण्डले आफ्नो नेतृत्वको सरकारले गरेका सुधार कार्यहरूको कार्यान्वयन वर्तमान ओली सरकारले रोकेको आरोप लगाएका छन् ।
सुनसरीमा जनतासँग माओवादी तराई मधेस जागरण कार्यक्रमको देबानगन्जमा आज बिहीबार आयोजित भेटघाट कार्यक्रममा उनले भने ‘माओवादी नेतृत्वको सरकारले कृषि मल आपूर्ति सहज बनाएको थियो, अहिले फेरि पुरानै अवस्था देखिन थालेको छ ।’
उनले समयमै विद्यार्थीको हातहातमा पाठ्यपुस्तक पुर्याउने गरेकोमा अहिले यसमा पनि समस्या आउन थालेको बताए । अघिल्लो सरकारले नागरिकता विहीनलाई नागरिकता दिन कानुन बनाए पनि त्यसलाई कार्यान्वयन गर्न अहिलेको सरकारले रोकेको प्रचण्डले आरोप लगाए ।
पूर्व प्रधानमन्त्री प्रचण्डले भने ‘मिटरव्याज पीडितको समस्या समाधानका लागि हामीले कानुन बनाए पनि अहिलेको सरकारले त्यसलाई लागु गरेर यो समस्या समाधान गर्न चाहेको देखिँदैन ।’
यस्ता धेरै सुधारका कार्य रोकेर सरकारले भ्रष्ट, माफिया र विचौलियालाई सहयोग पुग्ने मात्रै काम गरिरहेको उनले आरोप लगाए ।
माओवादी अध्यक्ष प्रचण्डले अहिलेको सरकारले जनताले पाएको सुधार मात्र होइन संविधानले दिएको अधिकार पनि खोस्न खोजिरहेको तर त्यो सम्भव नभएको बताए ।
उनले संविधान संशोधनको प्रसङ्गलाई ‘तथाकथित’ चर्चा भएको बताउँदै भने ‘तथाकथित संविधान संशोधन जनताको अधिकार खोस्न खोजिएको छ, यो उनीहरूका लागि सपना मात्रै हो ।’
उनले उत्पीडित क्षेत्र र समुदायले ऐतिहासिक योगदानबाट आएको लोकतान्त्रिक गणतन्त्रमा यति चाँडै कुनै परिवर्तन सम्भव नभएको बताए ।
देबानगन्जले जनयुद्धमा ठूलो योगदान गरेको चर्चा गर्दै अध्यक्ष प्रचण्डले मधेसको ठूलो सम्भावना भनेकै कृषिमा रहेकोले कृषि पेन्सन, कृषि बीमा, ठाउँठाउँमा शीत भण्डार र बजार उपज बिक्री केन्द्र स्थापना गर्नुपर्ने बताए ।
_1664681437.jpg)
