_1735354691.gif)
धरान : ताप्लेजुङमा हिजो साँझ राँके जुलुस तितर वितर भएको बेला ताप्लेजुङका स्थानीय शिशिर पोमु लिम्बू घर भित्र भान्सामा खाना पकाई रहेका थिए ।
वीपी प्रतिष्ठानकाे इमरजेन्सीमा आज आइतबार बिहान ल्याइएका उनले भने ‘म भान्सामा खाना पकाई रहेको थिएँ, एक्कासि प्रहरीले घर भित्रै टियर ग्याँस हान्यो, हामी भाग्न घर बाहिर निस्कियौँ, निस्कने बित्तिकै पुलिसले लाठी चार्ज गर्यो ।’
टाउकोमा गम्भीर चोट लागेका पोमुसँग स्ट्रेचरमा सुतिरहेकाे अवस्थामा सोध्दा मलिन स्वरमा घट्नाको संक्षिप्त जानकारी दिएका हुन् । टाउकोमा गम्भीर चोट लागेका उनी उठेर बस्न सक्ने अवस्थामा थिएनन् ।
शिशिरले भने ‘आन्दोलनमा हामी लागेका छैनौँ भन्दाभन्दै जथाभावी लाठीले हाने, जोगिन खोज्दा पनि टाउकोमा लाठी लाग्यो ।’
उनी जस्तै त्यही घटनामा ताप्लेजुङका स्थानीय समर लिम्बू भने स्ट्रेचरमा पलेटी मारेर बसेका थिए । उनको दोब्रो हात भाँचिएको छ । प्रतिष्ठानकाे इमर्जेन्सीमा उपचारको प्रतीक्षामा रहेका दुवै घाइतेलाई हिजो साँझ ताप्लेजुङबाट एम्बुलेन्समा हिँडाई आज बिहान धरान ल्याइपुर्याइएको हो ।
प्रहरीको अश्रुग्याँसमा भागम्भाग भइरहेको बेला लाठी प्रहारबाट दाहिने खुट्टा भाँचिएर गम्भीर घाइते भएका इलामका राम राईको पाँचथर स्थित फिदिममा उपचार भइरहेको जसपा नेपालका केन्द्रीय सदस्य ताजुब लिम्बूले बताए ।
केबलकार विवाद बढेर ताप्लेजुङकाे सदरमुकाम फुङलिङ बजार शनिवार साँझ तनावग्रस्त भएको थियो । प्रहरीले कम्तीमा पनि २० जना आन्दोलनकारी पक्राउ गरेको बताइएको छ । दर्जन बढी घाइते भएका छन् ।
केबलकार विवाद बढेर ताप्लेजुङ सदरमुकाम फुङलिङ बजारमा शनिवार साँझ प्रदर्शनकारी र प्रहरी बिच झडप भएको थियो । त्यसै क्रममा प्रहरीले अश्रुग्याँस प्रहार गर्दा घर भित्रबाट बाहिर निस्किएका स्थानीयहरूमाथि लाठीचार्ज गरेर घाइते बनाएको घाइतेहरूको भनाई छ ।
निषेध आदेश जारी भएपछि आन्दोलनरत स्थानीयहरू बिच सम्पर्क हुन नसकेको, घाइतेहरूको उपचार समेत गर्न नपाएको नेता ताजुब लिम्बूले बताए ।
उनले भने ‘राज्यको दमन अति भयो अब सहँदैनौ, अब आन्दोलन अझ सशक्त हुन्छ, आज देशभर कोणसभा गर्ने तयारी गरेका छौँ ।’
_1664681437.jpg)
