_1735354691.gif)
विराटनगर : विराटनगर महानगरपालिकाले अब नागरिकताको प्रमाणपत्र प्राप्त गर्नको लागि कार्यालय धाइरहनु नपर्ने वडा कार्यालयबाट अनलाइनबाटै सिफारिस दिइने व्यवस्था गर्न लागेको छ ।
महानगरपालिकाले वडा कार्यालयबाट अनलाई सिफारिस सेवा सञ्चालन गर्न वडा सचिवहरू र कर्मचारीलाई आवश्यक अभिमुखीकरण सम्बन्धी २ दिने तालिम बुधवार सुरु गरिएको छ ।
अभिमुखीकरणमा विराटनगरका १९ वटै वडाका सचिव र सिफारिस हेर्ने कर्मचारी सहभागी छन् । पहिलो दिन बुधवार १, २, ३, ४, ५, ६, १०, १४, १७ र १८ का वडा सचिव र सिफारिस हेर्ने कर्मचारीलाई तालिममा सहभागी गराइएको छ । बिहीबार वडा ७, ८, ९, ११, १२, १३, १५, १६ र १९ का वडा सचिव र कर्मचारी सहभागी हुनेछन् ।
उनीहरूलाई अनलाइन डाटा इन्ट्री, वडामा डाटा इन्ट्री गरिसकेपछि जिल्ला प्रशासन कार्यालय पठाउने तरिका, नयाँ नागरिकताका लागि अनलाइन सिफारिस, सिफारिस गर्नुभन्दा अगाडि आवश्यक पर्ने कागजातलाई स्क्यान गर्ने तरिका लगायतका विषयमा जानकार बनाइने छ ।
अभिमुखीकरण तालिमको उद्घाटन गर्दै उपमेयर शिल्पा निराला कार्कीले ‘नागरिकताको अनलाइन सिफारिसले जिल्ला प्रशासन कार्यालयमा हुने ढिलासुस्ती र घण्टौँ लाइनमा बस्नु पर्ने झन्झट कम भई महानगरवासीलाई राहत पुग्ने विश्वास लिएका छौँ ।’
अब कुनै कारणले नागरिकता हराए वा नष्ट भएमा त्यसको विवरण सहजै पाउन सकिने उनले बताइन् । उपमेयर कार्कीले भनिन् ‘सिफारिस गर्दा कर्मचारीलाई समस्या नहोस् भनेर महानगरले तालिम सञ्चालन गरेको हो ।’
निमित्त प्रमुख प्रशासकीय अधिकृत रामप्रसाद ढुङ्गेलले कम्प्युटर चलाउन जान्नेले नागरिकताको अनलाइन सिफारिस सहजै गर्न सक्ने बताए । उनले सरकारको नीतिअनुसार नागरिकताको अनलाइन सिफारिस सुरु भएको उल्लेख जानकारी दिए ।
यसअघि नागरिकताको अनलाइन सिफारिस गत आइतबार मेयर नागेश कोइरालाले वडा ९ बाट शुभारम्भ गरेका थिए । विराटनगर सहित मोरङका १७ स्थानीय तहका १५९ वटै वडाबाट अनलाइन नागरिकता सिफारिस सुरु भइसकेको छ ।
_1664681437.jpg)
