_1735354691.gif)
धरान : येले संवत् ५०८५ नयाँ वर्षको अवसरमा आयोजित चौथो येले दोङ ओपन महिला पुरुष थ्री वाई थ्री बास्केटबलको उपाधि महिला तर्फ धरान मेघा हिमालयन कलेज र पुरुष तर्फको उपाधि झुनाज फिटेनसले चुमेको छ ।
भानु चौकमा सोमवार भएको प्रतियोगितामा महिला तर्फको फाइनल खेलमा धरान मेघाले रेड डेभिल्सलाई ८-७ अङ्कको अन्तरले पराजित गरेको हो । धरान मेघा हिमालयन कलेजले यसपालि सहित लगातार तेस्रो पटक जितेर उपाधिमा ह्याट्रिक गरेको छ ।
धरान मेघाले उपाधि सँगै नगद बिस हजार, ट्रफि, मेडल, प्रमाणपत्र, धरान विजनेस एक्सपोको र फ्रेन्डस सिनेमाको फ्री टिकट प्राप्त गरेका छन् । उपविजेता रेड डेभिल्सले नगद १० हजार, ट्रफि, मेडल र प्रमाणपत्र प्राप्त गरेका छन् ।
यसैगरि पुरुष तर्फको फाइनल खेलमा झुनाज फिटनेसले यलम्वर बास्केटबल क्लबलाई १६-१२ अङ्कको अन्तरले पराजित गर्दै उपाधि चुमेका छन् । उपाधि सँगै झुनाज फिटनेसले नगद ३० हजार, ट्रफि, मेडल, प्रमाणपत्र र धरान विजनेस एक्सपो र फ्रेन्डस सिनेमाको फ्री टिकेट प्राप्त गरेका छन् । उपविजेता यलम्वर क्लबले नगद १५ हजार, ट्रफि, मेडल र प्रमाणपत्र प्राप्त गरे ।
प्रतियोगिताको मोस्ट भ्यालुएवल प्लेयरको उपाधि महिला तर्फ धरान मेघा कलेजका शीतल तामाङ र पुरुष तर्फ झुनाज फिटनेसका कविन मगर घोषित भए ।
उनीहरूले जनही नगद २ हजार ५ सय, ट्रफि, प्रमाणपत्र र फ्रेन्स सिनेमाको फ्री टिकेट प्राप्त गरे । उनीहरूलाई समापन कार्यक्रमका प्रमुख अतिथि धरान उपमहानगरपालिका उपमेयर अइन्द्रविक्रम वेघा, सुनसरी बास्केटबल सङ्घका अध्यक्ष नारायण सुवेदी, किरात राई यायोक्खा केन्द्रीय उपाध्यक्ष दोर्पध्वज राई, सुनसरी अध्यक्ष राजेन्द्र राई, युवा नेता भिमज्वाला राई, धरान १८ वडाध्यक्ष नरेन्द्रकुमार राई प्रवीण राई लगायतले पुरस्कार वितरण गरे ।
यलम्वर संवतको नयाँ वर्षलाई भव्य रूपमा मनाउन किरात राई यायोक्खा सुनसरीको सहकार्यमा धरान बास्केटबल सङ्घको आयोजना, धरान उपमहानगरपालिकाको संयोजन तथा सुनसरी बास्केटबल सङ्घको प्राविधिक सहयोगमा धरान भानुचौकको खुल्ला स्थानमा एक दिने बास्केटबल प्रतियोगिता भएको हो ।
प्रतियोगिताको उद्घाटन कोसी प्रदेश सरकार सामाजिक विकास मन्त्री पाचकर्ण राईले बास्केटबल रिङमा बास्केट गरेर साकेला नाच्दै गरेका थिए । प्रतियोगितामा पुरुष २३ टिम र महिला ७ टिम सहभागी प्रतियोगितामा सुनसरी बास्केटबल सङ्घको प्राविधिक सहयोग रहेको थियो ।
_1664681437.jpg)
