इटहरी : निजी तथा आवासीय विद्यालय अर्गनाइजेसन नेपाल (प्याब्सन) कोशी प्रदेश समितिको अध्यक्षमा सुमित थापा सर्वसम्मत चयन भएका छन् । बुधवार इटहरीमा सम्पन्न चौथो अधिवेशनले थापाको नेतृत्वमा नयाँ समिति चयन गर्ने भएको हो ।

वरिष्ठ उपाध्यक्ष रहेका थापाको नाममा सर्वसम्मत भएपछि अन्य पदको लागि चुनावी प्रतिस्पर्धा हुने भएको छ । अन्य बाकी केही पदमा सर्वसम्मत गर्ने प्रक्रिया अगाडी बढे पनि पदाधिकारीमा निर्वाचन हुने सम्भावना देखिएको हो ।

प्याब्सन जिल्ला समितिबाट प्रतिनिधि छनौट भएर आएका ४२९ जनाले मतदानमा सहभागिता जनाउन पाउने भएका छन् । निर्वाचन मार्फत वरिष्ठ उपाध्यक्ष सहित, २ उपाध्यक्ष, एक सचिव, २ सहसचिव, एक कोषाध्यक्ष र दुई सह कोषाध्यक्ष सहितको पदाधिकारी निर्वाचित हुने भएको छ । पदाधिकारी बाहेक अन्य ६ जना सदस्य पनि निर्वाचनले टुङ्गो लगाउने भएको हो ।

वरिष्ठ उपाध्यक्ष बाहेक अन्य पदमा सर्वसम्मत गर्ने गरी नेताहरूले छलफल चलाएका छन् । वरिष्ठ उपाध्यक्ष आगामी कार्यकालको अध्यक्ष हुनसक्ने सम्भावनालाई मध्यनजर गर्दै चुनावी प्रतिस्पर्धा हुने आकलन गरिएको छ । इटहरीको दुर्गा पार्टी प्यालेसमा प्याब्सनको महाधिवेशन जारी छ।