_1735354691.gif)
धरान : पाहुना टोली भुटानको आरटीसी क्लबलाई चर्च ब्वाइजको गोलको वर्षासँगै चर्च ब्वाइज युनाइटेड क्लब काठमाडौँ बुढासुब्बा गोल्डकपको फाइनलमा प्रवेश गरेको छ ।
भुटानको रोयल थिम्पु कलेज (आरटिसी) क्लबलाई ७–० को फराकिलो अन्तरमा पराजित गर्दै चर्च ब्वाइज युनाइटेडले २५ औँ संस्करणको अन्तर्राष्ट्रिय आमन्त्रण बुढासुब्बा गोल्डकपको फाइनलमा प्रवेश गरेको छ ।
चर्च ब्याइजका समीर तामाङ र अर्माण्ड भिदोङले ह्याट्रिक गरे । समीर तामाङले खेलको २१ औँ मिनेट ५६ औ मिनेट र ८५ औँ मिनेटमा गोल गर्दै ह्याट्रिक पुरा गरे । त्यस्तै अर्माण्ड भिदोङले खेलको २७ औँ मिनेट, ५० औँ र ५२ औँ मिनेटमा गोल गर्दै ह्याट्रिक पुरा गरे ।
चर्च ब्याइजका पदम भट्टराईले खेलको २९ औँ मिनेटमा गोल गरे । चर्च ब्याइजले सुरुवातदेखि नै आरटिसीलाई दबाबमा राखेको थियो । खेलको २१ औँ मिनेटमा चर्च ब्याइजका समीर तामाङले गोल गर्दै टिमलाई अग्रता दिलाएका थिए ।
आरटिसीले सुरुवातमा नै अग्रता बनाउने सुनौलो अवसरमा गोल गर्न सकेन । खेलको १९ औँ मिनेटमा आरटिसीका नियन्दा योसेल वान भर्सेस वानमा गोल गर्न चुके ।
उनले गोल किपरलाई बिट गर्न खोज्दा असफल भए । त्यस पश्चात् आरटिसीले खेलमा त्यति राम्रो अवसर सिर्जना गर्न सकेन । आरटिसीले पहिलो खेलमा राष्ट्रिय जागृति क्लब इटहरीलाई ४–१ को फराकिलो अन्तरले पराजित गर्दै उच्च मनोबलका साथ चर्च ब्वाइज विरुद्ध मैदानमा उत्रिएको थियो । चर्च ब्वाइज भने नेपाल पुलिस क्लब विरुद्ध १–० को सङ्घर्षपूर्ण जित निकाल्दै सेमिफाइनलको यात्रा तय गरेको थियो ।
खेलको म्यान अफ द म्याच चर्च ब्याइजका समीर तामाङ घोषित भए । उनलाई नगद १० हजार पुरस्कार प्रदान गरिएको थियो । भोलीको खेल एनआरटी क्लब काठमाडौँ र युकेएफसी भारतबिच दोस्रो सेमिफाइनल खेल हुनेछ । माघ १९ गतेदेखि चलेको प्रतियोगिता २६ गतेसम्म चल्नेछ ।
प्रतियोगिताको विजेताले १० लाख र उपविजेताले ५ लाख नगद पुरस्कार प्राप्त गर्नेछन् । प्रतियोगितालाई गोर्खा ब्रुअरी प्रालिले मुख्य प्रायोजन गरेको छ ।
_1664681437.jpg)
