वराहक्षेत्र : वराहक्षेत्र नगरपालिका वडा नं. १ मा रहेको वराहक्षेत्र मन्दिर क्षेत्रमा भई रहेको सप्तकोशी नदीको कटान नियन्त्रणका लागि सरोकारवाला निकायका अधिकारीहरूले ऊर्जा जलस्रोत तथा सिँचाइ मन्त्री दीपक खड्कालाई निवेदन गरेका छन् ।
प्रतिनिधि सभा सदस्य ज्ञानेन्द्र बहादुर कार्की नेतृत्वको टोलीले मन्त्री खड्कालाई कटान नियन्त्रणका लागि तटबन्ध निर्माणकालागि गुरुयोजना सहित लिखित निवेदन पेस गरेको हो ।
मन्त्री खड्का समक्ष प्रतिनिधिसभा सदस्य कार्की सहित वराहक्षेत्र नगरपालिका नगर प्रमुख रमेश कार्की, वराहक्षेत्र मन्दिर गुठी व्यवस्थापन समितिका अध्यक्ष भक्तबहादुर श्रेष्ठ, सचिव सन्तोष भण्डारी, कोषाध्यक्ष रवि कुमार श्रेष्ठ, सदस्य दीपक परिवार लगायतको टोलीले निवेदन पेस गरेको हो ।
धर्तीको पहिलो तीर्थस्थलको रूपमा परिचित वराहक्षेत्र मन्दिर क्षेत्र सहित बजार एरिया सप्तकोशी नदीको कटानको उच्च जोखिममा रहेको र यसको नियन्त्रणका पूर्व मन्त्री ज्ञानेन्द्र बहादुर कार्की नेतृत्वमा वराहक्षेत्र मन्दिर गुठी व्यवस्थापन समितिका पदाधिकारी सहितको टोलीले मन्त्री खड्कालाई भेटेर लिखित निवेदन सहित आग्रह गरिएको नगर प्रमुख रमेश कार्कीले जानकारी दिए ।
नगर प्रमुख कार्कीका अनुसार विश्व हिन्दु जगतमा चार प्रसिद्ध क्षेत्र मध्ये एक प्रसिद्ध क्षेत्र सप्तकोशी नदी कटानबाट जोखिम अवस्थामा रहेको हुँदा यस्तो धार्मिक ऐतिहासिक साथै पुरातात्त्विक महत्त्व बोकेको पावन भूमिको समयमै संरक्षणका लागि कटान नियन्त्रणका लागि तटबन्ध निर्माणकालागि गुरु योजना सहित लिखित निवेदन पेस गरिएको हो ।
सप्तकोशी नदीले कटान गरी प्रसिद्ध क्षेत्र बराहक्षेत्रधाम कोसी नदीमै विलय हुने भयावह परिस्थितिलाई जोगाउन तटबन्धका लागि आवश्यक बजेट विनियोजनको माग गर्दै  निवेदन पेस गरिएको वराहक्षेत्र मन्दिर गुठी व्यवस्थापन समितिका अध्यक्ष भक्तबहादुर श्रेष्ठले बताए ।