विराटनगर : कोशी प्रदेश सरकारका मुख्यमन्त्री हिक्मतकुमार कार्कीले दुई तिहाइ बहुमत सहित विश्वासको मत प्राप्त गरेका छन् ।
कोशी प्रदेश सभामा आज बुधवार प्रस्तुत विश्वासको मत सम्बन्धी प्रस्तावमा मतदान हुँदा मुख्यमन्त्री कार्कीको पक्षमा दुई तिहाइ मत खसेको हो ।
मत विभाजनको प्रक्रियामा पक्षमा ६६ मत प्राप्त भएको छ भने विपक्षमा १५ मत खसेको छ । नेकपा एस समाजवादीका जनाले २ जना मतदान प्रक्रियामा सहभागी भएनन् । प्रदेश सभामा मतदान हुँदा ८३ सदस्य उपस्थिति थिए ।
यसअघि मुख्यमन्त्री  कार्कीले वैशाख ३१ गते विश्वासको मत प्राप्त गरेका थिए । गत भदौ १४ गते नेकपा माओवादी केन्द्रले समर्थन फिर्ता लिएपछि आज पुनः विश्वासको मत लिनुपरेको हो ।
कोशी प्रदेशमा ९३ प्रदेश सभा सदस्य छन् । नेकपा एमालेका ४०, नेपाली काँग्रेसका २९, नेकपा माओवादी केन्द्रका १३, राप्रपाका ६ नेकपा एकीकृत समाजवादीका ४ र जसपाको १ प्रदेश सभा सदस्य छन् ।
कोशी प्रदेशमा नेकपा एमाले र नेपाली काँग्रेसको गठबन्धन सरकार छ ।